Алматы облысында жол ережесін өрескел бұзған азаматтар әкімшілік жауапкершілікке тартылды, — деп хабарлайды kazlenta.kz тілшісі Polisia.kz сайтына сілтеме жасап.
Әлеуметтік желілерді мониторингтеу барысында жол қозғалысы ережелерін өрескел бұзу фактілері бейнеленген бейнематериал анықталды. Полиция тарапынан әрекет ету жедел әрі шешімді түрде жүзеге асырылды. Жүргізілген жедел іс-шаралардың нәтижесінде оқиғаға қатысқан барлық тұлға анықталып, аудандық полиция бөлімшесіне жеткізілді. Анықталғандай, құқық бұзушылар Қарасай ауданының тұрғындары – 1999, 2003 және 2007 жылы туған азаматтар. Оларға қатысты Әкімшілік құқық бұзушылық туралы кодекстің 7 бабы бойынша әкімшілік материалдар толтырылды.
Барлық көлік арнайы айып тұрағына қойылып, жүргізушілер көлік құралын басқару құқығынан 6 ай мерзімге айырылды. Сонымен қатар полиция қызметкерлері құқық бұзушылармен профилактикалық әңгіме жүргізіп, оларға қолданыстағы заңнама талаптары мен өздерінің жауапсыз әрекеттерінің салдарын түсіндірді. Полиция мұндай заң бұзушылықтар тек өздерінің ғана емес, басқа да жол қозғалысына қатысушылардың өмірі мен қауіпсіздігіне тікелей қауіп төндіретінін атап өтті. Алматы облысының полиция департаменті азаматтарды жол қозғалысы ережелерін қатаң сақтауға шақырады және әрбір жүргізушінің тәртібі мен жауапкершілігі тек өзінің ғана емес, жолдағы барлық адамның өмірі мен қауіпсіздігіне тікелей әсер ететінін еске салады.