«Astana Hub» халықаралық технопаркі edu.astanahub.com онлайн-білім беру платформасын іске қосты. Онда 19 мыңнан астам оқушы бағдарламалау негіздерін меңгеріп, 300 мұғалім жасанды интеллект пен ойын әзірлеу бағыттары бойынша арнайы оқудан өтіп жатыр, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Жобаға №85 шейх Тамим бен Хамад әл-Тани атындағы мектеп-лицейдің информатика пәні мұғалімі Серікжан Қарсақов та қатысқан. Ол осы бағдарлама арқылы өз әдістемесін әзірлеп, бүгінде бұл жүйе Астананың 9 білім ордасында – №1, 38, 48, 50, 59, 72, 73, 76 және 85 мектептерінде қолданысқа енгізілді.
Көрнекілік үшін Серікжан Қарсақов «Оқушылардың жасанды интеллектті пайдалану дағдыларын дамыту» тақырыбында жоғары сынып оқушыларына ашық информатика сабағын өткізді. Білім басқармасының мәліметінше, цифрлық сауаттылықты арттыру мақсатында 2024-2025 оқу жылында 12 қалалық семинар, ал жаңа оқу маусымында 2 семинар ұйымдастырылған.«Astana Hub» технопаркі аясындағы пилоттық жоба бойынша оқудан өткен информатика пәні мұғалімдеріне 10-11-сыныптарда «Жасанды интеллект» пен «Ойын әзірлеу» бағытында факультативтік курстар өткізуге қосымша сағат бөлінді. Бұл курстар оқушылардың заманауи цифрлық дағдыларын дамытып, IT саласындағы кәсіби бағдарын айқындауға бағытталған.