Алматының Алатау ауданында халықаралық деңгейдегі жаңа теннис орталығының құрылысы аяқталып келеді. Ол ITF және ATF стандарттарына сай және республикалық пен халықаралық турнирлерді қабылдауға дайын, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Орталық аумағында 4 жабық және 4 ашық қатты жабынды корт, сондай-ақ 6 топырақ жабынды корт бар. Көрерменге арналған трибуналар 250 орынға есептелген. Кешеннің жалпы аумағы 5 мың шаршы метрден асады. Орталық кәсіби спортшыларға да, әуесқойларға да арналған. Жаттығуды білікті жаттықтырушылар өткізеді. Әлеуметтік аз қамтылған отбасылардың балалары үшін тегін топтар ұйымдастырылады, ал көпбалалы отбасылар мен зейнеткерлерге жеңілдіктер қарастырылған. Нысан мүмкіндігі шектеулі азаматтарға толық бейімделген. Кешенде медициналық кабинет, асхана, TechnoGym жабдықтарымен қамтылған жаттығу залы және мәжіліс залы бар. Орталық күніне ең кемі 400 спортшыны қабылдай алады, -делінген хабарда.