Алматы әкімі Жетісу ауданында кеңес өткізді, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Негізгі мәселелердің бірі — Солтүстік айналма жол бойындағы, әсіресе Солтүстік айналма тас жолы мен Жұмабаев көшесі бойындағы ретсіз сауда, осы келеңсіздікке қатысты жыл басынан бері 756 хаттама жасалды. Полицияның қатысуымен бірлескен рейдтер жалғасуда. Солтүстік айналма жолы бойындағы базарларда өрт қауіпсіздігі туралы мәселе талқыланды. 2022 жылдан бері мұнда электр желілерінің тұйықталуы салдарынан өрт болған, өрт сөндіргіштер жоқтың қасы. Материалдар сотқа беріледі. Жол жөндеу жұмыстарына, «Халық қатысатын бюджет» жобалары, мектеп пен емхананың жағдайы бойынша мәселе көтерілді. Қала басшысы инженерлік желілер бойынша басталған барлық жұмысты 1 қыркүйекке дейін аяқтауды тапсырды.
Көшпелі кеңес аясында қала әкімі аудан тұрғындарын жеке қабылдады, оның барысында тұрғын үй қорын жаңартуға, жер телімі мен кәрізге қосылуға қатысты өтініштер қаралды. Түсініктеме беріліп, орындалу мерзімі белгіленді.