Қызылорда облысында жол қозғалысын бақылау үшін дрондар қолданылуда, – деп хабарлайды kazlenta.kz тілшісі Polisia.kz сайтына сілтеме жасап.
Қызылорда облысының аумағында, нақтырақ айтқанда республикалық маңызға ие Қарабұтақ – Қызылорда – Шымкент автожолында жол қозғалысы ережелерінің сақталуын бақылау мақсатында ұшқышсыз ұшу аппараттары белсенді түрде қолданылуда. Әуеден жүргізілген рейдтік іс-шаралар нәтижесінде жол қозғалысы ережелерін өрескел бұзған 27 жүргізуші анықталды. Олардың арасында қарсы бағытқа шығып, қауіпсіздік талаптарын елемей басып озу маневрін жасағандар да бар.
Барлық құқық бұзушыға қатысты әкімшілік хаттамалар толтырылып, материалдар тиісті шешім қабылдау үшін Қызылорда қаласының мамандандырылған әкімшілік сотына жолданды. Дрондарды пайдалану арқылы жол қозғалысын қадағалау жүйесі өңірдегі апатты-қауіпті жол учаскелерінде тұрақты негізде жүзеге асырылуда. Бұл шара жол-көлік оқиғаларының алдын алу, құқық бұзушыларды анықтау және жалпы жол қауіпсіздігін қамтамасыз ету мақсатында қолға алынған.