Жетісу полициясы дрондар көмегімен 27 жол ережесін бұзу дерегін анықтады, - деп хабарлайды kazlenta.kz тілшісі Polisia.kz сайтына сілтеме жасап.
Жетісу облысының полицейлері жол қозғалысын бақылау үшін заманауи технологияларды белсенді қолдануда. Жыл басынан бері дрондар көмегімен жолдың қарсы бағытына шығып кету сияқты 27 заңбұзушылық анықталды. Мұндай әрекеттер жол қозғалысына қатысушылар үшін үлкен қауіп төндіреді, себебі кенеттен пайда болған көлікке жүргізушілер әрдайым жылдам әрекет ете алмайды. Полиция ескертеді: жол ережелері қай жерде болсаңыз да, қатаң сақталуы тиіс. Кез келген тәртіп бұзушылық ауыр салдарға әкелуі мүмкін. Сондықтан "Жол қозғалысы ережелері қанмен жазылған" деген сөздің маңызын әр жүргізуші түсінуі керек.
Дрондарды пайдалану құқық қорғау органдарына заңбұзушылықтарды жедел анықтап, кінәлілерді жауапқа тартуға мүмкіндік береді. Бұл шара жүргізушілердің тәртібін күшейтуге және жол-көлік оқиғаларының санын азайтуға ықпал етеді. Барлық жүргізушілерге жол жүру ережелерін мұқият сақтауға кеңес беріледі. Ең бастысы – өз өміріңіз бен айналаңыздағы адамдардың қауіпсіздігін қамтамасыз ету.