Ақмолада полицейлер дрондардың көмегімен жол қозғалысы ережелерін бұзудың 120-дан астам фактісін анықтады, - деп хабарлайды kazlenta.kz тілшісі Polisia.kz сайтына сілтеме жасап.
Ақмола облысында 18 ақпанда басталған "Қауіпсіз жол" кең ауқымды акциясы өз жалғасын табуда. Шараның басты мақсаты – жол қозғалысы ережелерін бұзу фактілерінің алдын алу және ауыр жол-көлік оқиғаларына тосқауыл қою. Осы мақсатта заманауи технологиялар кеңінен қолданылып, полиция қызметкерлері дрондардың көмегіне жүгінуде.
Ұшқышсыз құрылғылар жолдағы тәртіп бұзушылықтарды жоғарыдан бақылап, жылдам әрекет етуге мүмкіндік береді. Атап айтқанда дрондар қауіпті маневрлерді анықтап, ақпаратты бірден жердегі патрульдік жасақтарға жібереді. Полиция қызметкерлерінің айтуынша, дрондардың көмегімен қарсы жолаққа шығу, тұтас сызықты кесіп өту және жаяу жүргіншілерге жол бермеу сияқты өрескел бұзушылықтарды анықтау әлдеқайда жеңілдеген.
Акция аясында дрондар жұмыс істеген уақыт ішінде 120-дан астам жол қозғалысы ережесін бұзу дерегі тіркелді. Оның ішінде: Қарсы қозғалыс жолағына шығу – 3 жағдай; Жаяу жүргіншілерге басымдық бермеу – 16 жағдай; Басқа да бұзушылықтар – 100-ден астам дерек бар. Полиция қызметкерлері дрондардың жол қозғалысын бақылаудағы рөлін жоғары бағалап, олардың тиімділігі артып келе жатқанын атап өтуде. Құқық қорғаушылардың пікірінше, мұндай заманауи технологияларды пайдалану жол қозғалысының қауіпсіздігін арттырып, жол-көлік оқиғаларының санын азайтуға септігін тигізеді.