Елордада есірткі жарнамасын бояу акциясы өтті. Астанада өткен кезекті акция барысында полицейлер мен еріктілер есірткі жарнамасын бояды, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Акцияға Сарыарқа ауданы әкімдігінің, Жастар саясаты мәселелері басқармасының, жергілікті полиция қызметі басқармасының, Қаланың есірткі қылмысына қарсы іс-қимыл басқармасының өкілдері, үкіметтік емес ұйымдар мен «Астана жастары» ЖРО еріктілері және елордалық мәслихат депутаты Дэвид Лория қатысты. Ұйымдастырушылардың айтуынша, іс-шараның негізгі мақсаты – есірткі қылмысының алдын алу, сондай-ақ тыйым салынған заттарға тәуелді елорда тұрғындарының санын азайту.
Акция 2024-2025 жылдарға арналған «Астана – есірткісіз қала» нашақорлыққа қарсы іс-қимыл және алдын алу жөніндегі іс-шаралардың кешенді жоспарын, сондай-ақ Дүниежүзілік нашақорлыққа қарсы күрес күніне арналған айлықты орындау шеңберінде ұйымдастырылды.