Қазақстан Республикасының Премьер-Министрі Олжас Бектеновтің тапсырмасы негізінде Премьер-Министрдің орынбасары Серік Жұманғарин, ауыл шаруашылығы министрі Айдарбек Сапаров, сондай-ақ ауыл шаруашылығы вице-министрлері жаппай егіс науқаны кезінде өңірлерді аралауды бастады, деп хабарлайды kazlenta.kz тілшісі Үкіметтің баспасөз қызметіне сілтеме жасап.
15 мамырда Ақмола облысына жұмыс сапары барысында Үкімет басшысы жаппай егіс науқанының басталауына қатысып, көктемгі дала жұмыстарының барысын тексерді. 18 мамырда ауыл шаруашылығы министрі Айдарбек Сапаров Қарағанды облысына барып, шаруалармен кездесіп, егіс жұмыстарының қарқынын көрді. Министр ауыл шаруашылығын мемлекеттік қолдау, оның ішінде ауыл шаруашылығы тауарын өндірушілерге тікелей жеңілдетілген несие беру арқылы қолдауға қатысты түсіндіру жұмыстарын жүргізді. Сонымен қатар министр егіс алқабына тыңайтқыштарды жеткізу шараларын бақылады.
19 мамырда Премьер-Министрдің орынбасары Серік Жұманғарин Түркістан облысына барды. Ол жер-жерлердегі фитосанитариялық жағдаймен танысып, әсіресе шегірткенің таралу қаупі бар аудандардағы егістіктердің жай-күйін көрді.
Ауыл шаруашылығы министрі А.Сапаров бүгінде Қазақстанның негізгі астық егетін облыстарының бірі Қостанай облысында саланың негізгі проблемалық мәселелері бойынша шаруалармен бірқатар кездесу өткізеді. Министр облыстағы егіс науқаны барысымен және өңірдегі фитосанитариялық ахуалмен танысу үшін бірқатар аудандарды аралайды. Аталған аудандарда шегірткенің таралу қаупі жоғары.
Сонымен қатар Премьер-Министрдің орынбасары Серік Жұманғарин, ауыл шаруашылығы министрі Айдарбек Сапаров және жауапты ауыл шаруашылығы вице-министрлері жаппай егіс науқаны аяқталмай тұрып, қалған өңірлерді аралап шығады.
Күн тәртібінде астық себудің тиімді мерзімі, ауыл шаруашылығы тауарын өндірушілерді жеңілдетілген несиемен қамту, шаруалардың несиелеріне 85%-ға кепілдік беру бойынша түсіндіру жұмыстары, тыңайтқыштарды жеткізу және басқа да мәселелер тұр.