Туу туралы куәлікке өтінімді онлайн режимінде және ХҚО арқылы беруге болады. Ағымдағы жылдың басынан бері 38 мыңнан астам куәлік берілді.
«Ата-ана атанған азаматтар туу туралы куәлікке тапсырысты өз бетінше проактивті түрде де және екінші деңгейлі банктердің қосымшалары арқылы да бере алады. Мемлекеттік қызмет тегін көрсетіледі», - деді «Азаматтарға арналған үкіметтің*» Шымкент қаласы бойынша филиалының директор орынбасары Қайрат Меңлібеков.
Айта кетер болсақ, жыл басынан бері 30 мыңға жуық ата-ана туу туралы куәлікті онлайн форматта рәсімдесе, ХҚО арқылы куәлік алуға 8 мыңнан астам өтінім берген.Естеріңізге сала кетейік, 1 шілдеден бастап АХАТ функциялары «Азаматтарға арналған үкімет» мемлекеттік корпорациясына өткен болатын. Дегенмен, некені тіркеуге өтініштерді қабылдау, өңдеу, сондай-ақ, шешімдер қабылдау және нәтижелерді беру АХАТ мамандарымен жүзеге асырылады.
Еске сала кетейік, 2023 жылғы 1 сәуірге Шымкент қаласының халық саны 1198,5 мың адамды құрады. 2022 жылғы 1 сәуірмен салыстырғанда халық саны 29,3 мың адамға немесе 2,5% артты.
2023 жылғы қаңтар-наурызда қалада 7,2 мың туу (2022 жылғы қаңтар-наурызға 101,6%) және 1,2 мың өлім (2021 жылғы қаңтар-наурызға 92,2%) оқиғасы орын алды. Қала бойынша 2023 жылғы қаңтар-наурызда 1000 адамға шаққанда туу және өлімнің жалпы коэффициенті тиісінше 24,37 және 4,19 болды.