"Азаматтарға арналған үкімет" мемлекеттік корпорациясының филиалы шымкенттіктерге дайын құжаттарды қажетті мекен жайға жеткізу қызметін пайдалана алатынын еске салады. Аталған қызмет іске қосылғаннан бері 700-ге жуық қызмет алушы өз құжаттарын Халыққа Қызмет көрсету орталықтарына бармай-ақ қолдарына алу мүмкіндігіне ие бола бастады.
Бұл еліміздегі цифрландыру саясатының сәтті жүзеге асып жатқандығының көрінісі болмақ. Қазіргі таңда 150 мемлекеттік қызмет бойынша дайын құжаттарды алдырту қолжетімді. Оның ішінде – жылжымайтын мүлікке құқықтарды яғни, ауыртпалықтарды мемлекеттік тіркеу, жер учаскелерінің актілері, білім туралы құжаттарды апостильдеу, мұрағат анықтамалары, әскери билеттердің төлнұсқаларын беру және тағы да басқалар бар.
"Құжаттарды жеткізу қызметі жеке тұлғаларға көрсетіледі. Алдымен клиент құжаттарды Халыққа Қызмет көрсету орталығына тапсырады, құжат дайын болғаннан кейін сілтеме көрсетілген SMS-хабарлама жолданады. Азамат сілтемеге өтіп, өтінімді толтырады, жеке сәйкестендіру нөмірі және жеткізу мекен - жайын енгізіп, жеткізу төлемін жасайды", – деді «Азаматтарға арналған үкіметтің» Шымкент қаласы бойынша филиалының баспасөз хатшысы Алтынай Татаева.
Осы тұста, айта кеткен жөн, сала мамандары - жүргізуші куәлігін, жеке куәлік пен төлқұжаттарды жеткізу қызметі бұл бойынша көрсетілмейтінін ескертеді.