16 желтоқсан – ата- баба арманы орындалып, ел егемен атанған, төбеміз көкке екі елі жетпей қалған күн. Ол - Тәуелсіздік күні.
Биыл бұл датаны қазақстандықтар 32-ші жыл атап өткелі отыр. Шымкент қаласындағы барлық деңгейдегі білім ошақтары меркеге орай түрлі іс-шаралар өткізіп, өскелең ұрпақ санасына осы күнді сіңіріп, маңызын ұғындыруда. Кезекті жиын – қаладағы Ахмет Байтұрсынов атындағы көпбейінді № 50 мектеп-гимназиясында аталып өтілді.
Тәуелсіздік – ең алдымен қазақ халқының бостандыққа ұмтылған асқақ армандары мен қайсар рухының жемісі. Сондықтан да әр азамат үшін Тәуелсіздік күні – ең қастерлі күн. Мектеп ұжымы жылдағы дәстүр бойынша жиын өткізіп, оқушылардың өнерін көпшілікке ұсынды.
Қазіргі таңда еліміздің көрікті қалалары мен білім, ғылым, денсаулық, спорт сынды салалары айрықша даму үстінде. Қазақстан - Біріккен Ұлттар Ұйымы, Еуроодақ, Халықаралық Валюта Қоры және ЮНЕСКО сияқты аса беделді халықаралық ұйымдарының толық құқылы және белсенді мүшесі болып отыр. Мұны оқушылар да жақсы біледі. Тарихты ұмытпайды, оқиды, зерттейді. Бейбіт күнді қастерлейді. Сондықтан болса керек, олардың ойлау қабілеті мен елге деген сезімдері ерекше жаңашылдыққа толы.
"Мен өз еліммен қашанда мақтанамын, қазір әлемдік деңгейге шыққан Қазақстанның барлық салада алатын орны ерекше. Болашақта біз білімімізді жетілдіре отырып, осы отанымыздың өркендеуіне үлес қосамыз деген мақсатпен оқудамыз. Қазақстан- менің мақтанышым!", - дейді мектеп оқушысы Нұрай Тұрар.