Жапониядағы XX жазғы Азия ойындары аяқталды. Құрлықтағы ең ірі спорттық дода қорытындысы бойынша Астана спортшылары 10 медаль – 1 алтын, 3 күміс және 6 қола жүлде жеңіп алды, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Елорда қоржынына жарыстың басты жүлдесін боксшы Айбек Оралбай салды. Ұлттық құраманың капитаны 90 келіден жоғары салмақ дәрежесінде чемпион атанды.
Үш күміс жүлдені спорттың әртүрлі түрінен өнер көрсеткен спортшылар иеленді. Адель Садақбаева стенд атудан командалық скит сайысында күміс жүлдегер атанса, Мерей Қабдуллаев джиу-джитсудан 85 келіге дейінгі салмақта екінші орын алды.
Азия ойындарының күміс жүлдегерлері қатарында Қазақстан ерлер құрамасы сапында өнер көрсеткен елордалық ватерполшылар Әділ Балтабекұлы, Душан Маркович, Срджан Вуксанович және Юлиан Вердеш те бар.
Елорда өкілдері алты қола медаль жеңіп алды. Эвелина Костенко ескек есуден 500 метр қашықтықтағы К4 экипажы құрамында үшінші орынға көтерілді. Сондай-ақ Назарбай Саттархан семсерлесуден қылышпен командалық жарыста қола жүлдеге ие болды.
Әртістік жүзуден аралас команда құрамында елордалық спортшылар Әйгерім Құрманғалиева, Анна Павлецова, Валерия Столбунова және Жаклин Якимова қола медаль жеңіп алды.
Екі қола медальді елордалық теннисшілер иеленді. Юлия Путинцева жекелей сында үшінші орын алса, Анна Данилинамен бірге жұптық сында да қола жүлдегер атанды.
Елорда өкілдерінің медаль қоржынына көркем гимнастикадан өнер көрсеткен спортшылар да үлес қосты. Жасмин Жүнісбаева, Кристина Чепульская, Аида Хакимжанова, Айзере Нұрмағамбетова және Мадина Мырзабай топтық көпсайыста қола медаль жеңіп алды.
Азия ойындары – құрлықтағы ең ірі кешенді жарыс және төрт жылдағы басты додалардың бірі. Қазақстан ұлттық құрамасы сапында Жапонияда өткен ойындарға Астанадан спорттың 30 түрінен 75 спортшы қатысты.