Елорда мәслихатының кезектен тыс сессиясында Астана әкімі Жеңіс Қасымбек алдағы бірнеше жылда қалада ірі жобаларды жүзеге асыруға жұмсалатын қаржы туралы айтты, - деп хабарлайды kazlenta.kz тілшісі Tengrinews.kz сайтына сілтеме жасап.
Бүгінде елордада жүзеге асырылып жатқан шығынды жобалардың бірі – LRT құрылысы. Басқа жобалар, мысалы, ЖЭО-3 пен кәріз құрылысын салу да осыдан кем емес қаржыны қажет етеді.
"Шындықты айту керек: LRT құрылысын аяқтау үшін бізге сонша қаржы керек. Алдағы екі-үш жылда 250-300 миллиард теңге. Жылу электр орталығын аяқтау үшін де жүздеген миллиард теңге қажет. Кәрізге келетін болсақ - бұл сұмдық сома. Тіпті айтқым келмейді, онда жүздеген және жүздеген миллиард теңге", - деді Қасымбек.
Кезектен тыс сессияда депутаттар Астана қаласының 2023-2025 жылдарға арналған бюджетіне өзгерістер мен толықтырулар енгізу туралы мәселені қарады. Жеңіс Қасымбек осы кезеңде қазынаға қосымша қаржы тартылатынына сенім білдірді.
"Жалпы, әрине, алдағы екі-үш жылда бюджетті толықтыру қиын болады деп күтіледі", - деді елорда әкімі.