AI-SANA жобаларының көрмесінде еліміздің жетекші жоғары оқу орындарының студенттері бағдарламаның үшінші кезеңі аясында әзірленген жасанды интеллектіге негізделген жобаларын таныстырды. Солардың қатарында Astana IT University студенттері әзірлеген CardioScan электрокардиограмманы (ЭКГ) талдауға арналған интеллектуалды платформа бар, деп хабарлайды kazlenta.kz тілшісі ҚР Ғылым және жоғары білім министрлігіне сілтеме жасап.
CardioScan жобасы жасанды интеллект көмегімен жүрек-қан тамырлары жүйесіндегі ықтимал патологияларды анықтауға бағытталған. Платформа портативті ЭКГ құрылғысы мен мобильді қосымшаны біріктіреді. Қосымша жүрек сигналын көрсетіп, оған алдын ала талдау жүргізеді және дәрігердің қарауына арналған есеп қалыптастырады. Сонымен қатар жүйе бұрын түсірілген ЭКГ-ның фотосуретін жүктеп, оны талдауға мүмкіндік береді.
«Біз жүрек патологияларын анықтауға арналған жүйе әзірледік. Құрылғымыз арқылы адамның ЭКГ-сын түсіріп, алынған деректерді жасанды интеллект моделіне жібереміз. Модель 33 мың сурет пен ЭКГ деректері негізінде оқытылған. Ол алынған ақпаратты талдап, жүрек ауруларының ықтимал белгілерін, соның ішінде аурудың ерте кезеңдеріндегі өзгерістерді анықтауға көмектеседі», – деді жобаны әзірлеуші, Astana IT University-дің бірінші курс студенті Артем Пинигин.
Әзірлеушінің айтуынша, жобаға Солтүстік Қазақстан кардиоорталығы қолдау көрсеткен. Қазіргі уақытта команда CardioScan жобасын Astana IT University базасында дамытып жатыр. Университет жобаны одан әрі жетілдіру үшін қажетті инфрақұрылыммен, жұмыс орнымен және материалдармен қамтамасыз етеді.
Жұмыстың келесі кезеңінде клиникалармен ынтымақтастықты кеңейтіп, модельді жетілдіруге қажетті қосымша деректер жинау жоспарланып отыр. Бұл анықталатын патологиялар аясын кеңейтіп, талдау дәлдігін арттыруға мүмкіндік береді.
CardioScan жобасы жасанды интеллект саласындағы студенттік әзірлемелердің медицинада қолданылып, отандық технологиялық шешімдердің дамуына үлес қоса алатынын көрсетеді.