Маңғыстау облысында биыл заңсыз айналымнан 225 келіден астам есірткі заты тәркіленді, деп хабарлайды kazlenta.kz тілшісі Polisia.kz сайтына сілтеме жасап.
Маңғыстау облысы полиция департаментінде 2026 жылдың тоғыз айындағы жедел-қызметтік жұмыстың қорытындысы бойынша жедел кеңес өтті. Кеңесті Маңғыстау облысы полиция департаменті бастығының міндетін атқарушы Ілияс Жұмағұлов өткізді. Кеңес барысында бөлімшелердің жедел-қызметтік жұмысының нәтижелері, криминогендік ахуал, қоғамдық және жол қауіпсіздігін қамтамасыз ету, есірткі қылмысына қарсы іс-қимыл, сондай-ақ профилактикалық жұмыстың тиімділігін арттыру мәселелері қаралды. Тоғыз айдың қорытындысы бойынша облыс аумағында тіркелген қылмыстық құқық бұзушылықтардың жалпы санының төмендегені байқалады. Бірқатар негізгі бағыттар бойынша оң динамикаға қол жеткізілді. Ауырлығы төмен қылмыстар саны 6%-ға, орташа ауырлықтағы қылмыстар 10,3%-ға азайды. Ұрлық фактілері 26,4%-ға, оның ішінде пәтер ұрлығы 38,5%-ға, ұялы телефон ұрлығы 47,6%-ға төмендеді. Алаяқтық фактілері 5,2%-ға, ауыр алаяқтық 5,8%-ға, тонау 33,3%-ға, бұзақылық 3,4%-ға азайды. Сондай-ақ қоғамдық орындарда жасалған қылмыстар саны 27%-ға, көшелерде жасалған қылмыстар 24,9%-ға төмендеді. Жол қауіпсіздігі саласында да оң нәтижелер бар.
Жол-көлік оқиғаларының саны 19,8%-ға, олардан зардап шеккендер саны 18,5%-ға, қаза тапқандар саны 10,3%-ға азайды. Есірткінің заңсыз айналымына қарсы іс-қимыл бағытындағы жұмыстар белсенді түрде жалғасуда. Жыл басынан бері 366 есірткі құқық бұзушылығы анықталды, оның ішінде 102-сі қылмыс, 264-і қылмыстық теріс қылық. Заңсыз айналымнан 225 келіден астам есірткі заты тәркіленді. Қылмыстарды ашуда бейнебақылау жүйесі маңызды рөл атқаруда. Бейнебақылау камераларының көмегімен 287 қылмыс ашылды. Сонымен қатар аса ауыр қылмыстарды ашу көрсеткіші 3,7%-ға жақсарды. Кеңес барысында Ілияс Жұмағұлов бөлімше басшыларына Қазақстан Республикасы Ішкі істер министрінің ІІМ алқасының отырысында қойған талаптары мен тапсырмаларын жеткізді. Құқықтық тәртіпті нығайтуға, құқық бұзушылықтардың алдын алуға, азаматтардың қауіпсіздігін қамтамасыз етуге, жеке құрам жұмысының сапасын арттыруға және қызметтік тәртіпті қатаң сақтауға ерекше назар аударылды. Кеңес қорытындысы бойынша бөлімше басшыларына жедел-қызметтік жұмысты одан әрі жетілдіру және негізгі бағыттар бойынша қалыптасқан оң динамиканы сақтау жөнінде нақты тапсырмалар берілді.