Қызылордада жол қозғалысы ережелерін өрескел бұзған екі жүргізуші жауапқа тартылды, деп хабарлайды kazlenta.kz тілшісі Polisia.kz сайтына сілтеме жасап.
Қызылорда облысы полиция департаментінің жедел басқару орталығының қызметкерлері түнгі уақытта жол қозғалысы ережелерін өрескел бұзған екі жүргізушіні анықтады. Оқиға 22 қыркүйек күні түнгі сағат 03:11 шамасында облыс орталығында орын алған. Бейнебақылау камералары арқылы екі автокөлік жүргізушісінің жол қозғалысы қағидаларын қасақана бұзғаны анықталды. Жүргізушілер тәуліктің қараңғы уақытында немесе көріну мүмкіндігі жеткіліксіз жағдайларда сыртқы жарық түсіретін аспаптарды пайдалану қағидаларын бұзған, жолаушылар мен жүктерді тасымалдау қағидаларын сақтамаған, сондай-ақ мемлекеттік тіркеу нөмірлік белгісі жоқ көлік құралын басқарған. Сонымен қатар маневр жасау талаптарын бұзып, өзге көлік құралдарына авариялық жағдай туғызған және қарсы қозғалыс жолағына шыққан.
Аталған құқық бұзушылықтар бейнебақылау камералары арқылы анықталып, ақпарат дереу жақын маңдағы патрульдік полиция экипажына берілді. Екі жүргізуші ұсталып, полицияға жеткізілді. Олар 18 жастағы Қызылорда қаласының тұрғындары болып шықты. Құқық бұзушыларға қатысты 10 хаттама ресімделіп, заңда белгіленген тәртіппен жазаланды. Екі автокөлік арнайы тұраққа қойылды. Жүргізушілерге мұндай әрекеттерге жол бермеу туралы ресми ескерту берілді. Полиция жол қозғалысына қатысушыларды жол қауіпсіздігі талаптарын қатаң сақтауға, өзге азаматтардың өмірі мен денсаулығына қауіп төндіретін әрекеттерге жол бермеуге шақырады.