Алматы әкімі Дархан Сатыбалды Алматыдағы Мажарстанның Бас консулы Саболч Карой Сёкемен кездесті. Тараптар сауда-экономикалық байланыстарды дамыту, инвестиция тарту, сондай-ақ туризм, білім беру, ғылым және мәдениет салаларындағы ынтымақтастық жайын талқылады, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Мажарстан Қазақстанның Еуропадағы маңызды серіктестерінің бірі саналады. 2025 жылдың қорытындысы бойынша Алматы мен Мажарстан арасындағы тауар айналымы 106 миллион АҚШ доллар болды. Кездесу барысында фармацевтика, агроөнеркәсіптік кешен, жасыл технология, цифрландыру және қала инфрақұрылымы салаларындағы өзара іс-қимылды дамыту мүмкіндіктері қарастырылды.
Білім беру саласындағы ынтымақтастыққа ерекше назар аударылды. Гуманитарлық байланысты нығайтуда Stipendium Hungaricum бағдарламасының маңызы зор. Аталған бағдарлама қазақстандық студенттерге Мажарстанның жоғары оқу орындарында білім алуға гранттар ұсынып келеді. Кездесу қорытындысында тараптар әріптестікті одан әрі кеңейтуге және жаңа бірлескен бастамаларды жүзеге асыруға дайын екендіктерін растады.