Алматы әкімі Дархан Сатыбалды Қазақстанға ресми сапармен келген ҚКП ОК Саяси бюросының мүшесі, ҚКП ОК Саяси-құқықтық комиссиясының хатшысы Чэнь Вэньцинмен кездесті, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Тараптар Қазақстан мен Қытай арасындағы серіктестікті дамыту, сауда-экономикалық және инвестициялық байланыстарды нығайту, сондай-ақ өңіраралық және гуманитарлық ынтымақтастықты кеңейту мәселелерін талқылады. Дархан Сатыбалды Алматының елдегі ең ірі экономикалық, қаржылық және туристік орталық ретінде Қытаймен ынтымақтастықты одан әрі дамытуға мүдделі екенін атап өтті. Кездесуде көлік және логистика, туризм, әуе қатынасын кеңейту және бірлескен инвестициялық жобаларды жүзеге асыру мәселелеріне ерекше назар аударылды. Чэнь Вэньцин екі ел арасындағы қарым-қатынастың жоғары деңгейін атап өтіп, экономика, білім беру, мәдениет және қауіпсіздік салаларындағы өзара іс-қимылды одан әрі дамытудың маңыздылығына тоқталды. Сондай-ақ ол «Бір белдеу – бір жол» бастамасының маңызын ерекше айтты. Қос тарап серіктестікті одан әрі нығайтуға және бірлескен жобаларды жүзеге асыруға дайын екендерін білдірді.