Алматыда ХХ ғасыр композиторларының шығармасы мен осы заманғы музыкалық премьералардың басын қосқан академиялық музыка фестивалі өтіп жатыр. Фестиваль бағдарламасы мен оның қаланың мәдени өміріндегі маңызы туралы Өнер академиясының Т. Абдрашев атындағы мемлекеттік академиялық симфониялық оркестрінің көркемдік жетекшісі әрі бас дирижері Қанат Омаров пен «Құрмет» орденінің иегері Еркебұлан Сапарбаев Өңірлік коммуникациялар қызметіндегі брифинг барысында айтып берді, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Фестиваль Алматыда осымен үшінші рет өткелі отыр. Осы уақыт ішінде ол осы заманғы академиялық музыканы дамытып, жаңа шығармашылық жобаларды қолдауға арналған елдегі маңызды мәдени алаңға айналған.
Фестиваль 15 мамыр күні салтанатты түрде ашылды. Қанат Омаровтың жетекшілігімен Т. Әбдірашев атындағы мемлекеттік академиялық симфониялық оркестр Густав Малердің әлемдік репертуардағы ең ауқымды әрі күрделі шығарманың бірі саналатын №6 симфониясын орындады.
Фестивальдің келесі концерті 30 мамыр күні Жамбыл атындағы Қазақ мемлекеттік академиялық филармониясының Үлкен залында өтеді. Кеш бағдарламасына Клод Дебюсси мен Бела Бартоктың шығармалары, сондай-ақ қазіргі қазақстандық композиторлар Рахат-Би Әбдісағин мен Р. Ибрагимовтың «TAU» атты туындысының әлемдік премьерасы енген.
«Фестиваліміздің мақсаты – көрерменге ХХ ғасыр композиторларының сирек орындалатын шығармасын таныстырумен қатар, қазіргі композиторларды да халыққа таныстырып өту, – дейді Қанат Омаров.
Кештің солисі ретінде халықаралық байқаулардың лауреаты, «Құрмет» орденінің иегері Еркебұлан Сапарбаев өнер көрсетеді.
Спикерлердің сөзінше, фестиваль классикалық музыканы насихаттап қана қоймай, қазіргі қазақстандық композиторлық мектепті қолдап, жастардың академиялық өнерге қызығушылығын арттыруға бағытталыпты.
«Бағдарламада тың әрі тосын дүние көп. Кейбір шығармаларды қазақстандық көрермен алғаш рет естуі мүмкін. Меніңше, фестивальдің басты миссиясы – тыңдарманды таңғалдыратын, көкжиегін кеңейтетін, әлемдік композиторлық мұрамен таныстыратын музыканы орындау», – дейді Еркебұлан Сапарбаев.
Брифинг қатысушыларының айтуынша, «ХХ26» фестивалі академиялық музыканың интеллектуалдық мұрасы мен замандық шығармашылық эксперименттерді ұштастырып, мәдени диалогтың, көрермендерді жаңа музыкалық бағыттармен таныстыратын үлкен алаңға айналып отыр.