Ақтөбеде дрондар көмегімен бір аптада ондаған құқық бұзушылық тіркелді, - деп хабарлайды kazlenta.kz тілшісі Polisia.kz сайтына сілтеме жасап.
Әкімшілік құқық бұзушылықтарды анықтауда ұшқышсыз ұшу аппараттарын (дрондарды) пайдалану бүгінгі таңда құқықтық тәртіпті қамтамасыз етудің тиімді құралдарының біріне айналды. Ақтөбе қаласының патрульдік полициясы бұл технологияны қызмет барысында белсенді түрде қолдануда. Мамандардың айтуынша, дрондарды пайдалану бақылау ауқымын кеңейтіп, қызмет тиімділігін арттыруға мүмкіндік береді. Сонымен қатар, ресурстарды үнемдеп, құқық бұзушылықтарға жедел әрекет етуге жағдай жасайды. Олардың мобильділігі мен кең қамту мүмкіндігі жол қозғалысын және қоғамдық тәртіпті, соның ішінде қолжетімсіз аумақтарды да бақылауға жол ашады.
Заманауи дрондар жоғары ажыратымдылықтағы камералармен, жылу бейнелеу құрылғыларымен және өзге де сенсорлармен жабдықталған. Бұл құқық бұзушылықтарды нақты уақыт режимінде анықтап, тіркеуге мүмкіндік береді. Атап айтқанда, жол қозғалысы ережелерін бұзу, заңсыз автотұрақ, қоғамдық тәртіпті бұзу, рұқсат етілмеген қоқыс тастау, сондай-ақ табиғатты пайдалану саласындағы заң бұзушылықтар анықталады. Мәселен, соңғы бір апта ішінде дрондардың көмегімен қарсы бағытқа шығудың 1 дерегі, ұялы телефонды пайдалану бойынша 3 құқық бұзушылық, жаяу жүргіншілерге жол бермеудің 19 жағдайы және қауіпсіздік белдігін тақпауға қатысты 8 дерек тіркелген. Дрондарды қолдану өз тиімділігін дәлелдеп, қаладағы жол қауіпсіздігін арттыруға және қоғамдық тәртіпті нығайтуға елеулі үлес қосып отыр.