Қызылордада полиция басқармасының қызметкерлері қоғамдық қауіпсіздікті қамтамасыз ету және жол қозғалысы қағидаларының сақталуын бақылау мақсатында қала аумағында дрондарды қолданып жатыр, – деп хабарлайды kazlenta.kz тілшісі Polisia.kz сайтына сілтеме жасап.
Құқық қорғау жүйесін цифрландыру маңызды бағыттардың бірі. Полиция дер кезінде құқық бұзушылықтардың алдын алуға баса мән бере отырып, ұшқышсыз ұшу аппараттарын белсенді түрде қолданып жатыр. Дрондар жаппай іс-шараларды бақылауға, жедел жағдайға мониторинг жүргізуге және құқық бұзушылықтарды нақты уақыт режимінде анықтауға мүмкіндік береді. Сонымен қатар ұшқышсыз ұшу аппараттары стратегиялық нысандарды күзету үшін, заңсыз кіру фактілерін тіркеу мақсатында да пайдаланылады. Жеке бағыттардың бірі – экологиялық құқық бұзушылықтарды анықтау. Атап айтқанда дрондардың көмегімен қоқысты заңсыз төгу, ағаштарды заңсыз кесу, қалдықтарды төгу және браконьерлік фактілері тіркеледі. Дрондар іздестіру-құтқару іс-шараларын жүргізу кезінде де белсенді түрде қолданылады.
Заманауи технологиялардың көмегімен жол қозғалысы қағидаларын бұзу, жаяу жүргіншілердің белгіленбеген жерден жолды кесіп өтуі, сондай-ақ басқа да құқық бұзушылықтар анықталып, барлық факті бойынша қолданыстағы заңнама аясында тиісті шара қабылдануда. Жол қозғалысы қауіпсіздігін сақтау – баршамызға ортақ міндет. Жаяу жүргіншілер жолды тек арнайы белгіленген жаяу жүргіншілер өткелдері арқылы өтуі тиіс.