Атырауда бейнебақылау камераларының көмегімен 24 мыңға жуық құқық бұзушылық анықталды, – деп хабарлайды kazlenta.kz тілшісі Polisia.kz сайтына сілтеме жасап.
Жедел басқару орталығы – қоғамдық орындардағы тәртіпті бақылауға, патрульдік полицияның жұмысын үйлестіруге және құқық бұзушылықтардың алдын алуға мүмкіндік беретін маңызды құрылым. Бүгінде Атырау қаласының аумағында 3506 бейнебақылау камерасы орнатылған. Бұл жүйе арқылы қылмыстық және әкімшілік құқық бұзушылықтарды анықтап, қоғамдық тәртіпті сақтау тиімді жүзеге асырылып келеді.
2024 жылдың алғашқы 11 айында бейнебақылау жүйесін белсенді пайдалану нәтижесінде 312 қылмыс пен 23 978 әкімшілік құқық бұзушылық тіркелді. Қылмыстар арасында ұрлық, ұсақ ұрлық және бұзақылық секілді оқиғалар басым. Ал әкімшілік құқық бұзушылықтардың қатарында алкогольдік ішімдік ішіп көлік жүргізу, қоғамдық орындарда мас күйде болу сияқты жағдайлар жиі кездеседі.
Сонымен қатар құқық бұзушылықтарды анықтауда «Interceptor» және «Сергек-Қорғау» жүйелерінің де маңызы зор.
«Interceptor» жүйесінің 2024 жылдың 11 айындағы нәтижелері: әкімшілік айыппұлдарын төлемеген 3876 борышкер анықталды; 1333 автокөлік арнайы тұраққа қойылды; 2543 әкімшілік айыппұлдар өнделді.
«Сергек-Қорғау» жүйесінің 2024 жылдың 11 айындағы нәтижелері: 28 945 құқық бұзушылық тіркелді; 19 477 айыппұл бойынша нұсқама берілді; 470 автокөлік айып тұрағына қойылды.
Бейнебақылау камераларының жұмысы – құқық бұзушылықтарды анықтауда және алдын алуда жаңа технологиялардың тиімділігі мен қажеттілігін айқын дәлелдеп отыр. Бұл жүйе қоғамдық тәртіпті сақтау мен тұрғындардың қауіпсіздігін қамтамасыз етуде маңызды құралға айналды.