Қызылордада көше тазалығын бұзғандар дрон арқылы анықталуда, — деп хабарлайды kazlenta.kz тілшісі Polisia.kz сайтына сілтеме жасап.
Қызылорда облысы Қазалы ауданында қоғамдық тазалықты сақтау бағытында бақылау шаралары күшейтілді. Аудан аумағында көше бойына тұрмыстық қалдықтарды заңсыз төгу деректерін анықтау мақсатында заманауи технологиялар, оның ішінде дрондар қолданылуда. Жүргізілген мониторинг нәтижесінде құқық бұзушылықтар тіркеліп, тиісті шаралар қабылдануда. Аталған жұмыстар қоршаған ортаны қорғау, санитарлық жағдайды жақсарту және тұрғындардың экологиялық мәдениетін арттыруға бағытталған.
Жыл басынан бері Қазақстан Республикасының әкімшілік құқық бұзушылық туралы кодексінің 434-2-бабы бойынша 54 айыппұл салынған, ал 505-бап бойынша 774 ескерту беріліп, 2 айыппұл салынған. Полиция азаматтарды тазалық пен тәртіпті сақтауға, қоқысты белгіленген орындарға ғана тастауға шақырады. Себебі рұқсат етілмеген жерлерге қоқыс тастау қоршаған ортаға зиян келтіріп қана қоймай, Қазақстан Республикасының заңнамасына сәйкес жауапкершілікке әкеп соғады.