Астанада қала тұрғындарына жаңа мамандықтарды меңгеруге және өз ісін дамыту үшін практикалық дағдылар алуға мүмкіндік беретін JOLTAP жобасы табысты түрде жұмысын жалғастырып келеді. Бағдарлама түлектерінің бірі – Ұлжан Ысқақова жобаға қатысу барысы туралы ой бөлісті, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Ұлжанның айтуынша, жобаға қатысу оған жаңа кәсіби мүмкіндіктерге жол ашқан.«JOLTAP жобасына қатысқым келді, өйткені бұл – жаңа мамандықты меңгеріп, пайдалы практикалық дағдылар алуға жақсы мүмкіндік. Қазіргі уақытта үнемі дамып, жаңа нәрселерді үйреніп отыру өте маңызды», – деді ол.
Астана тұрғыны оқуға нақты тәжірибе мен шынайы жұмыс барысында қолдануға болатын білім алу мақсатымен келгенін жеткізді. Оның сөзінше, жоба дәл сондай нәтиже берген.
Ұлжан Wildberries маркетплейсінде сатылым жүргізу бойынша курстан өтті, сондай-ақ бухгалтерлік есеп пен салық салу негіздерін оқыды. Қазір білімін жетілдіруді жалғастырып, таргеттелген жарнама бойынша курсқа қатысып жатыр. Оның айтуынша, оқу процесі түсінікті әрі қызықты ұйымдастырылған. Практикаға ерекше көңіл бөлінгендіктен, қатысушылар алған білімдерін бірден қолдана алған. Оқытушылар материалды жан-жақты түсіндіріп, сұрақтар туындаған жағдайда тыңдаушыларға көмектесіп отырған.
«Жалпы оқу маған қатты ұнады, себебі көп жаңа нәрсе үйреніп, пайдалы дағдыларға ие болдым», – деді жоба қатысушысы.
Ұлжанның айтуынша, оқу барысында айтарлықтай қиындықтар болмаған. Тек қатаң тәртіпке үйренуге тура келген – сабаққа кешігуге немесе қатыспай қалуға болмайды.
Алайда ол мұны бағдарламаның артықшылығы деп санайды. Оның пікірінше, мұндай жүйе жауапкершілік пен ұйымшылдыққа үйретіп, оқу процесіне байыппен қарауға көмектеседі. Соның нәтижесінде қатысушылар оқу үдерісіне белсенді қатысқан.
Бүгінде Ұлжан алған білімін жұмысында қолданып жүр. Ол дәл өзі оқыған салада еңбек етіп жатқанын айтты. Ол көпбалалы ана болғандықтан, оған ыңғайлы жұмыс кестесінің болуы өте маңызды. Сондықтан ол өз бетінше жұмыс істеп, кәсібін дербес дамытып келеді.«Оқу барысында алған білімім мен дағдыларым маған үлкен көмегін тигізді. Мен оларды жұмыс барысында үнемі қолданамын», – дейді ол.
«Алған білімім өз кәсібімді жүргізуде әлдеқайда дербес болуға көмектесті», – деді Ұлжан.
«Мен JOLTAP жобасын өз ісін іздеп жүрген немесе жаңа мамандық меңгергісі келетін барлық адамға ұсынар едім. Жоба мемлекет тарапынан үлкен қолдау көрсетіп, түрлі бағытта білім алуға мүмкіндік береді», – деді ол.