Алматыда 2030 жылға дейінгі дендрологиялық жоспар бекітіледі. Көгалдандыру және жасыл қорды дамыту мәселесі қала әкімі Дархан Сатыбалдының төрағалығымен өткен кеңесте қаралды, деп хабарлайды kazlenta.kz тілшісі Алматы қаласы әкімінің баспасөз қызметіне сілтеме жасап.
Бүгінде жасыл аймақтар 22,59 мың га жерді алып жатыр. Бұл қала аумағының 33 пайызына тең. Қалада 4 миллионнан астам ағаш өседі, оның шамамен 2,3 миллионы қоғамдық орындарда орналасқан.
Жоспарды дайындау аясында жасыл желекті түгендеу жүргізіледі: далалық таксация, барлық сегіз аудандағы топырақты талдау, тұрақты тұқымдық құрамды қалыптастыру. Әр аудан үшін жеке құжат әзірленеді.
2026 жылы 550 мыңнан астам жасыл желек отырғызу жоспарланып отыр. Оның ішінде 7,2 мың ірі көлемді ағаш (5-6 м), 40 мың көшет және 500 мың көпжылдық бұта бар. Ағаш егу жұмыстары магистральдық көшелер бойында, өзен жағалауларында және қайта жаңартылып жатқан көшелерде жүргізіледі.