Астанада Қ.Қуанышбаев атындағы қазақ ұлттық музыкалық драма театрында бүлдіршіндерге арнап Президенттік шырша тойы өтті, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Жаңажылдық бағдарламада қонақтар ауқымды интерактивті спектакльді тамашалады. Балалар басты кейіпкер Азаматпен бірге «Болашақта кім болу керек және қандай адам болу керек?» деген маңызды сұраққа жауап іздеді.«Бүгінгі шырша «Адал азамат» біртұтас тәрбие бағдарламасы аясында өткізіліп жатыр. Бұл бағдарламада балалар, ең бастысы, өзіміздің ұлттық құндылықтарымызды бойына көбірек сіңіреді. Қойылым жас ұрпақты адалдыққа, әділдікке және тазалыққа баулиды.
Оқиғалар желісінен жас жеткіншектеріміз түрлі мамандық иелеріне құрмет пен заң мен тәртіпке бағынушылық қағидаларын жадына түйіп жүретін болады деген ойдамын.
Театр сахнасында балалар өздеріне ұнайтын ертегілер мен мультфильмдерде оқып, көріп жүрген Таусоғар, Ер Төстік, және басқа да кейіпкерлермен кездеседі», – деді Астана қаласы Білім басқармасының басшысы Қасымхан Сенғазыев.
«Біз ұлымыз екеуіміз Президенттік шыршаға бірінші рет қатысып тұрмыз. Мен – «Особые праздники» қорындағы ерекше баланың анасымын. Балам – Руслан Ғизатов 13 жаста. Ол – кәсіби суретші, халықаралық байқаулардың жеңімпазы. Біз осындай орасан зор іс-шараға Астана қаласы әкімдігінен шақырту алғанымызға қуанамыз. Өйткені мұнда бәрі өте әдемі, көңілді. Алған әсерімізді айтып жеткізудің өзі қиын. Бүгінгі шыршаға келген балдырғандардың бәрі бақытқа бөленген шығар деп ойлаймын. Осындай тамаша күн сыйлағаны үшін ұйымдастырушыларға үлкен алғысымызды білдіреміз», – деді Астана тұрғыны Сәуле Мұхамеджанова.
Мереке соңында барлық балаларға жаңажылдық сыйлықтар берілді.Астанадағы Президенттік шырша құндылықтар идеясына толы болып, ерекше мерекелік атмосферада өз мәресіне жетті.