Жаңа жылдық шыршада әскерилердің балалары әр түрлі ойындар - ойнап, билер - билеп және өздерінің дайындап келген тақпақтарын айтты. Шараға жиналған бүлдіршіндердің барлығы бірдей Аяз ата мен Ақшақарды қуана қарсы алып тақпақтар мен әндерін айтып, өз өнерлерін көрсетіп жаңа жылдық шыршаны көңілді өткізді.
Бүлдіршіндердің ерекше өнерлеріне куә болған бөлім командирінің орынбасары подполковник Жәнібек Сарсенов шара барысында сөз алып бүлдіршіндерді мерекемен құттықтады.
"Сіздерді, ертегілер әлеміне еліктірер қызыққа толы ең ғажайып мерекелердің бірі 2023 Жаңа жылмен шын жүректен құттықтаймы. Сіздердің ата – аналарыңыз үшін жүздеріңізден нұр шашып, бар ықластарыңызбен қуанғандарыңызды көруден асқан бақыт жоқ. Бүгінде еліміздің барлық аймақтарында өздеріңіздей бүлдіршіндер шырша шамын жағып мерекені көтеріңкі көңіл - күймен қарсы алуда. Сондықтанда бүгінгі ұйымдастырылып отырған шара естеріңізде қалатын ерекше кеш болады деп сенемін", - деді өз құттықтауында.
Салтанатты шарада балалар Жаңа жылдың басты сәні жасыл шыршаны айналып шаттық пен қуанышқа бөленіп, мерекелік қойылымдарды тамашалады.Осылайша шараға әртүрлі киім үлгісін киіп келген балалар, көтеріңкі көңіл күймен ертегілер еліне саяхаттады. Шара соңында Аяз ата мен Ақшақар бүлдіршіндерге сыйлықтарын тарту етті.
Ертуған Әубакир