Астанада тәртіп сақшысы ұрлықтың жолын кесті, – деп хабарлайды kazlenta.kz тілшісі Polisia.kz сайтына сілтеме жасап.
Елорда тұрғыны Байтұрсынов көшесінің бойындағы дүкендердің бірінде бола жаздаған ұрлықтың жолын кескен полиция қызметкеріне ризашылығын білдірді. Оқиға жол-көлік оқиғасын рәсімдеу кезінде болды. Сол сәтте дүкеннің иесі жүгіріп келіп, дүкеніне ұры түскенін хабарлады. Патрульдік полиция полкінің аға инспекторы Ержан Алтынбеков қызметтік көлігімен дереу оқиға орнына жетті де, ұрлық жасамақшы болған азаматты құрықтады. Қырағылық танытқан инспектордың әрекеті дүкен қызметкерлері мен келушілердің қауіпсіздігін қамтамасыз етті.
Тұрғын полицейдің батылдығы мен жылдам шешім қабылдауын жоғары бағалап, қоғамдық тәртіпті сақтаудағы оның адалдығын атап өтті. Полиция азаматтардың қолдауы мен алғысы қызметкерлерді ынталандырып, құқық бұзушылықтардың алдын алу және қоғамдық қауіпсіздікті қамтамасыз ету бағытындағы жұмыстарды одан әрі жауапкершілікпен жүргізуге оң ықпал ететінін еске салады.