Түркістан облысының полицейлері 82 келі темір ұрламақ болған күдіктілерді оқиға орнынан ұстады, деп хабарлайды Polisia.kz.
Қазығұрт АПБ-ға жергілікті тұрғын ұрлықтың құрбаны болғандығы туралы арызданған. Оның айтуынша, Алматы-Термез тас жолынан 772 шақырым қашықтықта орналасқан өзіне тиесілі учаскідегі 82 келі темірлерін белгісіз азаматтардың автокөліктеріне салып, ұрламақ болғанын көрген. Содан соң бірден тәртіп сақшыларынан көмек сұрау мақсатында 102-ге хабарласқан.
Ал полиция қызметкерлері аталған жайтты ҚР ҚК-нің 188-бабы (Ұрлық) бойынша СДТТБТ-ға тіркеп, оқиға орнына жедел түрде жетті. Осылайша дер кезінде келген полицейлер күдікті екі азаматты оқиға орнында құрықтады. Оларды бірден Қазығұрт АПБ-ға жеткізіп, тергеу амалдарын бастап кетті.
Белгілі болғандай күдікті екі азамат та Сарыағаш ауданының тұрғындары болып шықты. Бірі бұдан алдын ұрлық жайты бойынша сотты болған. Қазіргі таңда аталған жайтқа байланысты тергеу амалдары жүргізілуде. Күдікті азаматтардың бас шарасы “келу туралы міндеттемеде”. Полиция қызметкерлері тұрғындарға қырағы болып, өздерінің бағалы мүліктерін сақтау үшін қауіпсіздік шараларын қабылдау қажеттілігін ескертеді. Егер сіз ұрлықтың құрбаны немесе куәгері болсаңыз, тез арада полицияның “102” нөміріне хабар беріңіз.