Жамбыл облысында 41 браконьер ұсталып, 233 құқықбұзушылық анықталды, - деп хабарлайды kazlenta.kz тілшісі Polisia.kz сайтына сілтеме жасап.
20 қазан мен 19 қараша аралығында Жамбыл облысында табиғатты қорғау және жануарлар дүниесін сақтау мақсатында "Браконьер" республикалық акциясы өткізіліп жатыр. Іс-шара барысында өңір аумағында жүргізілген рейдтік жұмыстардың нәтижесінде 233 әкімшілік құқықбұзушылық анықталып, 1 қылмыстық іс тіркелді.
Ең көп құқық бұзушылықтар Шу ауданында тіркеліп, 41 браконьерлік дерек анықталды. Анықталған заңбұзушылықтардың басым бөлігі — аңшылық ережелерін бұзу (171 дерек) және қару айналымы қағидаларын сақтамау (44 дерек) фактілеріне қатысты болды. Сонымен қатар, заңсыз балық аулаудың 18 жағдайы тіркелді. Мойынқұм ауданында заңсыз аңшылық фактісі бойынша сотқа дейінгі тергеу амалдары басталды. Тек соңғы тәулікте облыс полицейлері табиғатты қорғау саласында 17 құқық бұзушылықты анықтады. Жамбыл облысының полиция департаменті өңір тұрғындарын табиғатты аялауға және аңшылық пен балық аулау кезінде заң талаптарын қатаң сақтауға шақырады.