Алматы әкімдігі мемлекеттік сатып алуға қатысатын мердігер ұйымдарға қойылатын талаптарды күшейтіп отыр. Қала басшылығы мерзімді бұзатын, стандартты сақтамайтын және міндеттемелерін орындамайтын компаниялардың жолын кеседі. Бұл туралы Алматы Өңірлік коммуникациялар қызметінде өткен брифингте мәлімдеді, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
«Біздің ұстанымымыз айқын әрі қатаң: Алматыда тек жауапты мердігерлер жұмыс істеуге тиіс. Жеңіл пайда табуға, сапасыз жұмыс істеуге келгендерге мұнда орын жоқ. Біз адал бизнесті қолдаймыз, ал тәртіп бұзғандарға ең қатаң шара қолданамыз», – деді қала әкімінің орынбасары Олжас Смағұлов.
2025 жылы тоғыз айда Алматыда Бірыңғай сатып алу ұйымдастырушысы жалпы құны 750 миллиард теңгеден асатын 1 274 байқау өткізген. Оның басым бөлігі құрылыс және инфрақұрылымдық жобаларға тиесілі. Алайда кейбір мердігерлер белгіленген көлеммен жұмыс істеуге қауқарсыз болып, не тапсырыстарды үшінші тұлғаларға беріп, нәтижесінде жұмыс кестесінің бұзылуына себеп болып отыр.
Республикалық деңгейде сатып алу ережелеріне өзгерістер енгізілді: енді мердігерлерді іріктеу кезінде олардың орындаған жобаларының күрделілігі ескеріледі. Бұл тәжірибе кездейсоқ немесе әлсіз компаниялардың қатысуын шектейді. Сонымен қатар қала әкімдігі жауапкершілікті арттыру жөнінде ұсыныстар жолдады: міндетіне салғырт қараған жеткізушілер тізімінде болу мерзімін ұзарту мен айыппұл мөлшерін ұлғайту көзделген.