Биыл 1 қазаннан бастап ШҚО-да жылыту маусымы ресми түрде бастау алды. Аймақ алдағы қысқа тыңғылықты әзірлікпен кірісіп отыр: көмір қоры ертерек жасақталып, барлық инфрақұрылым толықтай дайындалған, ал тұрғындар алғашқы жылу толқынын сезіне бастады, деп хабарлайды kazlenta.kz тілшісі ШҚО әкімдігінің баспасөз қызметіне сілтеме жасап.
Облыстық энергетика және тұрғын үй-коммуналдық шаруашылығы басқармасының басшысы Нұрлан Рамазановтың мәліметінше, Шығыс Қазақстанда халықтың қажеттілігіне 352,1 мың тонна көмір жеткізілген. Бұл жоспарланған көлемнің 78 пайызын құрайды. Өңірдегі үш ірі жылу электр орталығы қалыпты режимде жұмыс істеп тұр. Барлық жылу көздерінде 20 тәулікке жететін нормативтік отын қоры жасақталған. Көмір тасымалы мен баға тұрақтылығына күн сайын бақылау жүргізіліп келеді.
Жылу алдымен Өскемен мен Риддер қалаларына, сондай-ақ Алтай, Үлкен Нарын, Глубокое, Зайсан, Күршім, Тарбағатай, Ұлан және Шемонаиха аудандарына берілді. Ал Катонқарағай мен Самар аудандарында жылу беру 3 қазанда, Марқакөл өңірінде 4 қазанда басталды. Барлық әлеуметтік нысандар – мектептер, балабақшалар мен ауруханалар жылумен толық қамтылған. Көпқабатты үйлер техникалық талаптар мен бекітілген кестеге сәйкес кезең-кезеңімен қосылуда.
Қыс маусымына дейін облыс бойынша 190 автономды және 33 орталықтандырылған қазандық дайындық актісін алған. Жөндеу жұмыстары барысында 52,8 шақырым жылу желісі мен 537 шақырым электр желісі жаңартылып, 39 қосалқы станса және 55 трансформаторлық пункт жөндеуден өтті. Сонымен қатар апаттардың алдын алу мақсатында 243 шақырым электр желісі бойындағы ағаштар мен бұталар тазартылды.
Төтенше жағдайлар кезінде жедел әрекет етуге арналған апаттық бригадалар толық жабдықталып, қажетті техникамен қамтамасыз етілген. Ақау болған жағдайда қолданылатын іс-қимыл алгоритмдері алдын ала әзірленіп, іске қосуға дайын.
Өңірді көмірмен үздіксіз қамтамасыз ету мәселесі ҚР Энергетика министрлігі, «Қазақстан темір жолы» ҰК» АҚ және «Қаражыра» АҚ тарапынан тұрақты бақылауда тұр.