Ақмола облысының Целиноград ауданына қарасты Қоянды ауылында тұрғындарды мемлекеттік электр желілеріне қосу жұмыстары басталды. Жобаны іске асыру Целиноград ауданы әкімдігі мен «АЭҮК» АҚ-ның бірлескен жұмысының арқасында мүмкін болып отыр, деп хабарлайды kazlenta.kz тілшісі Ақмола облысының баспасөз қызметіне сілтеме жасап.
2025 жылғы 24 қыркүйекте маңызды алғашқы қадам жасалды – ұзақ жылдан бері алғаш рет 84 отбасы тұрақты мемлекеттік электрмен жабдықтауға қол жеткізді. Бұдан бөлек, «АЭҮК» АҚ төрт трансформаторлық қосалқы станцияны желілерге қосуға техникалық шарттар берді, бұл шамамен 1500 абонентті электр энергиясымен қамтамасыз етуге мүмкіндік береді.
Ұзақ уақыт бойы ауыл тұрғындары жеке трансформаторлық қосалқы станциялардың қызметін пайдалануға мәжбүр болып келді, бұл көптеген қолайсыздықтар туғызған болатын. Бүгінде жаңа кезең басталуда – мемлекет барлық абоненттерді сенімді әрі қауіпсіз электр энергиясымен қамтамасыз ету жауапкершілігін біртіндеп өз мойнына алуда.
Целиноград ауданы әкімдігінде атап өткендей, Қоянды ауылында «Ауыл – Ел бесігі» ұлттық жобасы аясында электр желілерінің құрылысының екінші кезеңі аяқталуға жақын. Жобаны мердігер ұйым «НКО» ЖШС жүзеге асыруда. Жоба аясында 2 тарату және 16 трансформаторлық қосалқы станция, шамамен 9000 бағана орнату қарастырылған. Құрылысы жүріп жатқан желілердің жалпы ұзындығы 178 шақырымды құрайды.
Целиноград ауданының әкімі Дарын Сабырғалиұлы Қоянды ауылының мемлекеттік желілерге қосылуы аудан инфрақұрылымын жаңғырту жөніндегі кешенді жұмыстың бір бөлігі екенін атап өтті:
«Тұрғындарды тұрақты әрі сапалы электр энергиясымен қамтамасыз ету – бұл тек жайлылық мәселесі ғана емес, сонымен бірге экономиканы одан әрі дамыту, инвестициялар тарту және халықтың өмір сүру сапасын арттырудың негізі. Біз жұмысты кезең-кезеңімен жалғастырып, ауданның әрбір үйінде жарық, жылу және сенімділік болуына жағдай жасаймыз»,-деді ол.
Қалған абоненттерді қосу жұмыстары кезең-кезеңімен жүргізіледі. Жақын арада Қоянды ауылының барлық тұрғыны мемлекеттік желілерге қосылып, бұл ауылдың орнықты дамуына және халықтың өмір сүру деңгейінің артуына ықпал етпек.