Ел Конституциясының 30 жылдығына орай Астананың Есіл ауданында абаттандырылған 2 аула салтанатты түрде ашылды. Жаңарту жұмыстары Бөкейхан көшесі, 21 мекенжайындағы және Ұлы Дала даңғылы, 47 мекенжайындағы тұрғын үйлердің аулаларында жүргізілді, деп хабарлайды kazlenta.kz тілшісі Астана қаласы әкімдігінің ресми сайтына сілтеме жасап.
Ашылу рәсімінде мерекелік дастархан жайылып, ұлттық тағамдар мен тәттілер ұсынылды. Балаларға аниматорлар қызықты ойындар, командалық жарыстар мен спорттық сайыстар ұйымдастырды.Шараны ұйымдастырушылар аулаларды жаңартуға үлес қосқан белсенді азаматтарды марапаттап, үй үлкендері жиналған қауымға батасын берді.Жаңа аулаларда заманауи ойын және спорттық алаңдар: әткеншектер, сырғанақтар, жаттығу құралдары, Workout-аймақтары мен жайлы тынымдық орындар орнатылды. Балалар мен спорт алаңдарына жаңа жабындар төселіп, демалыс аймақтары мен жарықтандыру құрылғылары жаңартылды.
Есіл ауданының әкімі Дәрменияр Қыдырбек-ұлының айтуынша, биыл аталған аулалардан бөлек, «Халық қатысатын бюджет» жобасы аясында ауданда тағы алты жоба жүзеге асырылып жатыр.
Айта кетейік, биыл елордада шамамен 170 аула мен қоғамдық кеңістік (саябақтар, скверлер, бульварлар) абаттандырылуда. Бұл жұмыстар барлық аудандарды, оның ішінде тұрғын алаптарды да қамтиды. Бүгінгі таңда аумақтардың басым бөлігінде жұмыстар аяқталды.