"Құқықтық тәртіп" ЖПІШ барысында көлік полицейлері үш күнде 1400-ден астам азаматты жауапкершілікке тартты, – деп хабарлайды kazlenta.kz тілшісі Polisia.kz сайтына сілтеме жасап.
26-28 тамыз күндері көліктегі полиция департаментінің және оның желілік бөліністерінің қызмет көрсету аумағында республикалық "Құқықтық тәртіп" жедел алдын алу іс-шарасы өткізілді. Аталған іс-шараны өткізу барысында 16 қылмыс пен қылмыстық теріс қылық тіркеліп, олардың барлығы "ізін суытпай" ашылды. Жедел-іздестіру іс-шараларының нәтижесінде бұрын жасалған 7 қылмыс әшкереленді. Іздеуде жүрген 14 қылмыскер құрықталды. Үш күн ішінде көлік полицейлері әртүрлі құқық бұзушылықтар үшін 1466 тұлғаны жауапкершілікке тартты. Сондай-ақ Қазақстан Республикасында болу ережелерін бұзғаны үшін 92 шетел азаматы ұсталып, тиісті жауапқа тартылды. Заңды өкілдерінің қарауынсыз тұрғын үйден тыс көлік нысандарында жүрген 82 жасөспірім анықталды, олардың 14-і кәмелетке толмағандарды бейімдеу орталығына орналастырылды.
Құжаттары жоқ және тұрақты мекенжайы анықталмаған 17 адам қабылдау-тарату орындарына жеткізілді. Департамент бойынша 114 адам дактилоскопиялық және фото-видео есепке алынды. Сондай-ақ іс-шараға кинологиялық қызмет орталығының мамандары жұмылдырылды, олар қызмет көрсету аумақтарында қызметтік-іздестіру иттерімен патрульдеу жұмыстарын жүргізді. Бұған қоса, елдің барлық әуежайы және теміржол көлігі нысандары, жолаушылар пойыздары келу-кету кезінде және жол жүру барысында тексерілді.