Есентай өзенінің бойында жаңа қоғамдық кеңістік бой көтермек, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Алматы қаласының әкімдігі елдегі ірі құрылыс компанияларының бірі – BI Group компаниясын Есентай өзенінің бойын абаттандыру бойынша ауқымды жобаға тартты.BI Group компаниясы әл-Фараби даңғылынан Рысқұлов даңғылына дейін Есентай өзенінің жағалауын көріктендіруге 11 млрд теңгеден астам қаржы құймақ. Жоба бизнестің әлеуметтік жауапкершілігі аясында қолға алынған.
Биылғы басты меже — жобаның алғашқы кезеңін тәмамдау: әл-Фараби даңғылынан Абай даңғылына дейінгі аралықты жаңарту көзделіп отыр. Бұл аумақта велосипед және жаяу жүргіншілерге арналған жолақтар, жаңа скверлер мен жастарға, мәдени іс-шараларға, белсенді әрі тыныш демалысқа арналған қоғамдық орындар - демалыс аймақтары салынбақ. Жаңа бағыт тұрғын үй кешендерін, студенттік кампустарды, мәдени және спорттық нысандарды қамтиды. Жоба ашық аумақтарды қосымша көгалдандыруға және жаңа скверлер құруға мүмкіндік береді. Алматы әкімдігі қаланы дамыту мен тұрғындардың өмір сүру сапасын арттыруға септігін тигізетін әлеуметтік жауапты бизнесті тартуды жалғастыра бермек, - делінген хабарламада.