Дархан Сатыбалды Сайран көлін жаңғырту барысы бойынша мердігер компания өкілінің есебін тыңдады. Қала басшысы көркейту мен көгалдандыру сапасын арттыру жөнінде бірқатар нақты тапсырма жүктеді, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Негізгі басымдық – инклюзия, қауіпсіздік және жайлылық: * мүмкіндігі шектеулі азаматтар мен сәбиін арбамен алып жүретін ата-аналарға қолайлы жағдай жасау;* баспалдақтарға таяныш орнату жұмыстарын жеделдету;* жасыл желекті арттыру: ағаш, бұта және көпжылдық гүлді көбейту;* жер бедерін ескере отырып, сәулеттік жарық беру мен ландшафтық дизайнды жетілдіру. Сайран адам көп келетін орталық болмақЖобада ұзындығы 2,5 шақырым болатын серуен жолы, жағажай, балалар және спорт алаңдары, вело және скейтпарктер, қоғамдық дәретханалар, полиция пункттері мен құтқару бекеттері қарастырылған. Қазіргі таңда атқарылған жұмыстар:* 39,5 мың шаршы метр асфальт және 28,5 мың шаршы метр кеспе тас төселді;* 662 жарық шамы мен 30 бейнебақылау камерасы орнатылды;* 4 мыңнан астам ағаш пен 9 мың бұта егілді;* жағажай жасау үшін 11 мың тонна құм жеткізілді, делінген хабарламада.
«Жұмыстың созылып кетуіне немесе салғырт орындалуына жол берілмейді. Жаңғырту жұмыстарының аяқталу мерзімі жіті бақылауда болады», - деді Дархан Сатыбалды.