«Алматы Қала Жарық» МКК қаладағы сыртқы жарықтандыру жүйесін жаңғыртуды жалғастыруда. 2025 жылдың 4 айында 12 мыңнан астам жарық нүктесі ауыстырылып, 450 тірек орнатылды, 110 шақырым кабель желісі тартылды, деп хабарлайды kazlenta.kz тілшісі Алматы қаласы әкімдігінің баспасөз қызметіне сілтеме жасап.
Жыл соңына дейін 15 мыңнан астам жаңа шам орнату жоспарланып отыр. Оның ішінде 5700 торшерлі тірек қаланың саябақтары мен көшелеріне қойылады. Сонымен қатар, 70 маңызды нысанға сәулеттік жарық орнатылады.Әл-Фараби, Абай, Төле би, Сейфуллин, Назарбаев, Әуезов және Наурызбай батыр көшелеріндегі жарық жүйелері жаңартылып жатыр.Ұлы Жеңістің 80 жылдығына орай 28 гвардияшы-панфиловшылар саябағы толығымен жарықтандырылды. Саябақ ішіндегі аллеялар мен жолдарға 45 жаңа шам қойылып, Армия үйі маңына қосымша тіректер мен сәулеттік жарық орнатылды.Сондай-ақ, Кіші Алматы өзені бойында, Байзақов, Абылай хан, Дулати көшелерінде және Жетісу ауданында да жұмыс жалғасуда.Жарық мүлде болмаған жерлерге баса мән беріліп отыр, - делінген хабарламада.