Қазақстан Республикасының Премьер-министрі Олжас Бектенов Қазақстанға ресми сапармен келген Германия Федеративтік Республикасы Бундесратының Президенті Анке Релингермен кездесу өткізді, деп хабарлайды kazlenta.kz тілшісі Үкіметтің баспасөз қызметіне сілтеме жасап.
Онда сауда-экономикалық ынтымақтастықты дамыту және энергетика, металлургия, геологиялық барлау, өнеркәсіп кооперациясы, көлік және логистика, цифрлық технологиялар және басқа да салалардағы өзара іс-қимылды нығайту мәселелері талқыланды. Мемлекет басшылары деңгейінде қол жеткізілген уағдаластықтарды жүзеге асыруға назар аударылды.
Қазақстан Премьер-министрі мен Германия Федеративтік Республикасы Бундесратының Президенті өзара сауда көлемін арттыру жоспарларын талқылады. Қазақстан – Германияның Орталық Азиядағы жетекші экономикалық серіктесі. Еліміздің үлесіне ГФР-дың Орталық Азия өңірімен жалпы саудасының 81%-ы тиесілі. Былтыр Қазақстан мен Германия арасындағы тауар айналымы 5,9%-ға өсіп, шамамен $4 млрд-қа жетті. Бұл ретте қазақстандық өнім экспорты 56,8%-ға өсіп, $1,2 млрд-ты құрады.
Кездесуде инвестициялық әріптестікке ерекше көңіл бөлінді. 2005 жылдан бері Қазақстан экономикасына шамамен $7,2 млрд көлемінде тікелей неміс инвестициялары салынған Оның ішінде 90%-дан астамы шикізаттық емес секторға тиесілі. Олар – өңдеу өнеркәсібі, химиялық өнімдер, құрылыс материалдары өндірісі, көлік және АӨК. Бірлескен инвестициялық портфельде бүгінде жалпы сомасы $54,4 млрд-тан асатын 65 жоба бар. Елімізде неміс капиталының қатысуымен 1100-ге жуық кәсіпорын жұмыс істеп тұр. Жалпы сомасы $1,1 млрд-тан асатын 32 жоба сәтті аяқталған.
Қазақстан мен Германия арасындағы экономикалық қарым-қатынаста энергетика саласы маңызды рөл атқарады. Қазақстан ГФР-ға мұнай жеткізу бойынша үшінші орында тұр. Былтыр Германия 10,6 млн тонна Қазақстан мұнайын импорттаған. Келіссөздер барысында қазақстандық мұнайды ГФР-ға жеткізу көлемін арттыру перспективалары талқыланды.
Негізгі назар сутегі және «жасыл» энергетика саласындағы бірлескен жобаларды жүзеге асыруға, минералды ресурстарды бірлесіп игерудегі әріптестікке, АЭА аумақтарында озық өнеркәсіптік кластерлер құруға және терең технологиялық кооперациялар жасақтауға аударылды.
«Біздің міндетіміз – еліміздің берік өнеркәсіптік іргесін қалыптастыру және экономикалық жағынан өз-өзімізді қамтамасыз етуге қол жеткізу. Біз өңдеуші секторды терең өңделген кластерлер құру арқылы жедел дамытуға баса назар аударып отырмыз. Басым бағыттарға металдарды қайта өңдеу, мұнай, газ және көмір химиясы, ауыр машина жасау, уранды конверсиялау және байыту, сондай-ақ автомобильдердің құрамдас бөліктері мен тыңайтқыштар жатады. Қазақстан германиялық бизнес үшін тартымды боларлық барлық факторларға ие. Бұл дегеніміз – әртараптандырылған энергия көздері, транзиттік және көліктік әлеует, маңызды табиғи ресурстар. Инвесторлар үшін бізде әртүрлі салықтай және кедендік жеңілдіктер қарастырылған», — деп атап өтті Олжас Бектенов.
Өз кезегінде Германия Федеративтік Республикасы Бундесратының Президенті Анке Релингер Қазақстанмен сауда-экономикалық байланысты нығайтуға мүдделі екенін білдірді.
«Біз сіздің еліңізге Орталық Азиядағы біз үшін маңызды мемлекет ретінде үлкен қызығушылықпен қараймыз. Саяси диалог пен мәдени-гуманитарлық өзара іс-қимылдың оң динамикасын сақтағымыз келеді. Экономика саласындағы ынтымақтастықты кеңейту – біз үшін маңызды. Қазақстанды біз ең алдымен жақсы серіктес ретінде танимыз», — деп атап өтті Анке Релингер.
Сондай-ақ сауда-экономикалық әріптестікті арттырудың негізгі факторы ретінде көлік-логистикалық өзара байланысты дамытудың маңыздылығы атап өтілді. Орта дәліз арқылы ЕО елдеріне, соның ішінде Германияға жүк көлемі былтыр 4,5 млн тоннадан асқан. Қазақстанның логистикалық әлеуетін кеңейту бүгінде бүкіл Еуропалық Одақтың мүдделеріне сәйкес келеді.
Кездесу қорытындысы бойынша тараптар барлық перспективалық бағыт бойынша өзара тиімді ынтымақтастықты нығайту ниетін жеткізді.