Талдықорған өңірі өкілдігінің ұйымдастырумен облыстық Тіл сарайында ҚМДБ Төрағасы, Бас мүфти Наурызбай қажы Тағанұлының жетекшілігімен жарық көрген «Ихсан – рухани тәрбие негізі» кітабының танытымы өтті, деп хабарлайды kazlenta.kz.
Игі шараға өңірдің бас имамы Алмас Данағұлов, облыстық дін істері басқармасының басшысы Бауыржан Амангелдіұлы, облыстық мәдениет, архив және құжаттар басқармасының басшысы Марлен Қапашұлы, облыстық жастар мәселелері басқармасының басшысы Елдар Қайсарұлы, арнайы шақырылған шығыстанушы ғалым, ҚМДБ ғұламалар кеңесінің мүшесі Төрәлі Қыдыр, сондай-ақ облыстық «Жетісу» газетінің бас редакторы Әрін Әміре, облыстық «Жетісу» телерадиокорпорациясының бас продюсері Досан Қызайбекұлы, ҚР мәдениет қайраткері Сағындық Жұмаділов, қоғам қайраткері Жұмахмет Жанахметұлы, Жетісу мемлекеттік университетінің деканы Амангелді Толамисов, өңірдің ақсақалдар кеңесінің төрағасы Сәдуақас Бәйкен, қала-аудан имамдары мен дін мәселелерін зерттеу орталығының мамандары қатысты.
Қазақтың ұстазы, ұлы ақыны атанған Абай Құнанбайұлының туған күні құрметіне ұйымдастырылған кітаптың тұсаукесерінде алғашқы болып сөз алған Талдықорған өңірінің бас имамы Алмас Сағидоллаұлы аталмыш еңбектің рухани құндылықтары жөнінде тоқталып, құнды еңбек болашақта жастардың жан азығы, халықтың рухани шамшырағына айналарына сенетіндінгін жеткізді. Шара барысында жиналған зиялы қауым кітаптың жарық көруімен құттықтап, ізгі тілегі мен алғыстарын жеткізді.
Аталмыш еңбекте Ислам ғұламаларының ихсан ілімі жайлы ой-толғамдары жазылған. Кітапта әрбір адамға аса қажет көркем мінез бен тәлім-тәрбие қалыптастыру жөнінде баяндалған.