Жетісу өңірінің сенім телефонына жүгінушілердің мәселелері тез арада шешімін табуда, деп хабарлайды kazlenta.kz.
Жыл басынан барлығы 23 қоңырау келіп түсіп, мамандар тарапынан сұрақтарға тиянақты жауаптар берілген. Қоңырау тақырыптарының барлығы - діни мәселелер. Көбіне ислам бағытына байланысты. Хабарласқан азаматтардың басым көпшілігі жастар болып табылады. Алматы облысы бойынша Талдықорған мен Алматы қаласынан – 8, Алакөл ауданынан – 2, Қарасай ауданынан – 8, Кербұлақ – 1, Панфилов ауданынан 4 қоңырау келіп түсті.
Түсіндіру мен анықтау жұмыстарын талап ететін қоңыраулар есепке алынып, кешенді шаралар жүргізілуде. Сенім телефонының қызметі мен жұмыс тәртібі бұқаралық ақпарат құралдары, яғни облыстық, аудандық басылымдарға, «Жетісу» телеарнасының телемаркеті мен жүгіртпе жолына, облыстық дін істері басқармасының ресми сайтына, орталыққа қарасты ресми фейсбук, инстаграмм, вконтакте интернет желісінде, халық көп шоғырланатын орындарға, қоғамдық көліктерге, мекемелердің ескертпе тақталарына хабарламалар беру арқылы көпшіліктің назарына жеткізілуде.
Аудан, қалаларда сенім телефоны бойынша билбордтар, флаерлар ілінді.
Қазіргі кезде жалпы адамдық құндылықтарға негізделген рухани-адамгершілік жаңару үдерісі жүріп жатыр, қоғамда діннің рөлі артып келеді. Бұл халықаралық құқық қағидаттарына негізделген тиісті заңнамалық реттеуді қажет етеді. Сондықтанда сенім телефонының жұмыс жасауы облыс тұрғындарына қажет. Жетісулықтар орталықтандырылған, тегін 8-800-080-28-95 нөмірі арқылы дін саласына қатысты сұрақтар мен ұсыныстарын айтып, елорданың діни бірлестіктері мен діни ғимараттары, діни мерекелер туралы ақпарат ала алады.
Дін саласы - өте нәзік. Рухани құндылықты іздеуге ниеттенген азаматтар өздерінің діни сауатының төмендігіне байланысты дәстүрлі діни бірлестіктер мен теріс пиғылды діни ағымдардың ара жігін ажырата алмай, адасып жататыны жасырын емес. Әдетте, теріс діни ағымның ықпалына түскен тұлға сыни ойлау қабілетінен айырылып, діни жетекшінің айтқанын абсолютті ақиқат ретінде қабылдайды. Осының салдарынан ұлттық құндылықтардан бас тартып, экстремистік идеологияны қабылдап, теріс бағыттағы діни ұйымдардың қолшоқпарына айналады. Міне осындай сәтте, дер кезінде көрсетілген теологиялық және психологиялық көмек адамның өмірін құтқаруы немесе оның тағдырын өзгертуі мүмкін, – дейді Алматы облысының дін істері басқармасының қызметкелері.