Орал қаласында жасырын патрульдеу барысында полиция бірқатар жол қозғалысы ережелерін бұзған жүргізушілерді анықтады, – деп хабарлайды kazlenta.kz тілшісі Polisia.kz сайтына сілтеме жасап.
Қоғамдық тәртіпті сақтау, көшелерде және басқа да қоғамдық орындарда, Батыс Қазақстан облысының аумағында қылмыстардың алдын алу, жолын кесу мақсатында 2024 жылғы 2-6 қыркүйек аралығында “Құқықтық тәртіп” республикалық жедел-профилактикалық іс-шарасы өткізіліп жатыр.
Рейдтік іс-шара барысында Н.Назарбаев даңғылы бойындағы орталық көшеде бір сағат ішінде көлік құралдары жүргізушілерінің бірқатар құқық бұзушылықтары тіркелді.
Мәселен, Lada автокөлігінің жүргізушісі ҚР ӘҚБтК 595-бабының 1-бөлігі бойынша, Toyota Hilux және Lexus маркілі автокөлігінің жүргізушілері жол қозғалысы ережелерін бұзуға жол берді. Сондай-ақ Lexus, Haval, Hyundai, Kia автомашиналарының жүргізушілері қауіпсіздік белдігін тақпаған, яғни ҚР ӘҚБтК 593-бабы 2-ші бөлігі бойынша осы баптың талаптарын бұзды.
Сонымен қатар, Kia, Hyundai транзиттік яғни шетелдік есептегі автокөлік жүргізушілерінің құжаттарын тексеру кезінде ҚР ӘҚБтК 230-бабының талаптарын бұзып, яғни сақтандыру полисінсіз көлікті басқарған. Автокөліктер арнайы автотұраққа қамалды.
Сондай-ақ Toyota Camry автокөлігі бағдаршамның қызыл түсіне өтіп, ҚР ӘҚБтК 599-бабының 1-бөлігінің талаптарын бұзды.
Полиция департаменті қозғалыстың барлық қатысушыларын жол ережелерін қатаң сақтауға шақырады, өйткені жолдағы қателік түзетілмейтін салдарға әкелуі мүмкін.