Алматы облысында жаңғырту жұмыстарынан кейін Қонаев теміржол вокзалы пайдалануға берілді. Нысанды жаңарту Мемлекет басшысының тапсырмасына сәйкес еліміз бойынша 124 теміржол вокзалын реконструкциялау және жаңғырту жөніндегі ауқымды бағдарлама аясында жүзеге асырылды.
Жаңғырту барысында жолаушылардың жайлылығы мен қауіпсіздігін арттыруға бағытталған кешенді құрылыс-монтаж жұмыстары жүргізілді. Вокзал ғимаратының қасбеті мен ішкі бөлмелері жаңартылып, инженерлік желілер, жылыту, сумен жабдықтау және электрмен қамту жүйелері толық жаңғыртылды. Сондай-ақ жаңа жолаушылар платформасы салынды, вокзал маңы абаттандырылып, заманауи күту аймақтары жасақталды, навигациялық жүйе жетілдіріліп, жүріп-тұруы шектеулі азаматтар үшін қолайлы жағдайлар қамтамасыз етілді.
Қонаев теміржол вокзалы Алматы облысындағы өңірлер арасындағы жолаушылар қатынасын қамтамасыз ететін маңызды көлік нысандарының бірі болып табылады. Жобаны іске асыру нәтижесінде жолаушыларға қызмет көрсету сапасы артып, қолайлы жағдайлар жасалды және өңірдің көлік инфрақұрылымы жақсарды.
Еліміз бойынша 124 теміржол вокзалын жаңғырту бағдарламасы – Тәуелсіздік жылдарындағы вокзал инфрақұрылымын жаңарту бағытындағы ең ауқымды жобалардың бірі. Бағдарлама барлық өңірлерді қамтып, теміржол көлігінің қауіпсіздігін, қолжетімділігін және жолаушыларға көрсетілетін қызмет сапасын арттыруға бағытталған.
Алматы облысында бағдарлама аясында төрт теміржол нысаны – Қонаев, Шамалған, Жетісу және Қазыбек бек (Ұзынағаш) вокзалдары жаңғыртылуда. Бұл жобалардың жүзеге асырылуы өңір тұрғындарына көрсетілетін көлік қызметінің сапасын едәуір арттырып, заманауи теміржол инфрақұрылымын қалыптастыруға мүмкіндік береді.