Алматыда 12 жастағы бала пышақ жарақатынан қаза тапты. Қылмыс жасады деген күдікті 13 жаста. Марқұмның туыстары оның кәмелетке толмауына байланысты жауапкершіліктен құтылып кетуі мүмкін деп қауіптенеді, - деп хабарлайды kazlenta.kz тілшісі Tengrinews.kz сайтына сілтеме жасап.
11 маусымда танымал әлеуметтік желілердің бірінде 12 жастағы баланың өлімі туралы ақпарат тарады. Баланың әпкесі қайғылы жағдайды жария етуге көмектесуді сұрап, жұртшылыққа жүгінді. Олардың басты қорқынышы - кінәлінің жазадан құтылып кету ықтималдығы.
"Кеше кешке 12 жастағы жиенімді өлтіріп кетті. 13 жастағы екі жасөспірім оған 9 рет пышақ салған. Олар жазалануы үшін оқиғаның қоғамда резонанс тудыруына көмектесіңіздер. Себебі біздің елде қылмыстық жауапкершілік 14 жастан басталады! Баланы қайтара алмаймыз, ал олар тек шартты мерзім ала ма?" - деп жазды ол.
Отбасының айтуынша, олар әлі күнге дейін тергеу барысы туралы толық ақпарат алмаған. Туыстарының сөзінше, полиция ештеңе хабарламай отыр, ал тәркіленген бейнежазбаларды көрсетпейді.
Дәл осы себепті марқұмның жақындары іске тиісті деңгейде көңіл бөлінбей, кінәлілер жауапкершіліктен жалтарып кете ме деп қауіптенеді.
"Біз олар жазаланбай қала ма деп қорқамыз. Оларды құтқарып алады ма деп қауіптенеміз", - делінген жарияланымда.
Еске салсақ, бұған дейін Алматы Полиция департаменті кісі өлтіру дерегі бойынша қылмыстық іс қозғалғанын хабарлаған болатын. Баспасөз қызметі қылмыс жасады деген күдікпен Алматының 13 жастағы тұрғыны, жәбірленушінің бұрынғы танысы ұсталғанын нақтылады.