Астанада «Таза Қазақстан» экологиялық акциясы аясында жалпықалалық тазалық күні өтіп, оған 100 мыңнан астам адам қатысты. Экологиялық бастамаға 2 683-тен астам кәсіпорын, ұйым мен мекеме қолдау көрсетті, деп хабарлайды kazlenta.kz тілшісі елорда әкімдігінің ресми сайтына сілтеме жасап.
Таңертеңнен бастап қала тазалығына бизнес өкілдері, мемлекеттік мекемелердің қызметкерлері, еңбек ұжымдары, жастар мен елорда тұрғындары жұмылды.
Қатысушылар аулалар мен қоғамдық кеңістіктерді тазалап, қаланы көгалдандыру жұмысына атсалысып, қоршаған ортаға жауапкершілікпен қарайтынын көрсетті.
Бұл жұмысқа 1 208 бірлік арнайы техника тартылды. Акция барысында шамамен 230 тонна қоқыс шығарылып, 2 150-ден астам аула тазартылды. Сондай-ақ 220 саябақ пен гүлзар, 78 тарихи-мәдени ескерткіштің аумағы ретке келтірілді.
Қатысушылар аумақтарды тазалаумен қатар ағаш отырғызып, қоғамдық орындарды абаттандыру жұмысына да қатысты. Бұл тұрғындар арасында экологиялық мәдениетті қалыптастыруға септігін тигізеді.
Жалпы, 11 сәуір мен 16 мамыр аралығында өткен экологиялық айлыққа 240 мыңнан астам елорда тұрғыны және шамамен 12,4 мың кәсіпорын мен ұйым қатысты.
Осы уақыт ішінде 4 700-ден астам арнайы техника жұмылдырылып, 1 200 тоннадан астам қоқыс шығарылды. 8 540-тан астам аула тазартылып, 1,4 мыңнан астам аялдама павильоны мен 17,1 мың метр көше қоршауы жуылды.
Бұдан бөлек, қалада шамамен 30 мың жасыл желек отырғызылды.
Елордадағы тазалық пен абаттандыруға бағытталған экологиялық акция жалғасып жатыр.