2020 жылғы 19 қарашада сағат 09:08-де «Шығанақ» ТМҚП диспетчерінің пультіне Алматы-Екатеринбург тас жолының 413 шақырымында Алматы –Нұр-Сұлтан бағытымен жүріп бара жатқан жолаушылар автобусы сынғаны туралы хабарлама келіп түсті, деп хабарлайды ҚР ТЖМ АМО ММ Жамбыл облысы бойынша филиалы.
Сол сәтте салонда 10 жолаушы болған, барлық жолаушылар Қазақстан Республикасының азаматтары.
Эвакуациялау жұмысын жүргізу және медициналық көмек көрсету үшін оқиға орнына дереу «Шығанақ» ТМҚП бригадасы жіберілді. Бригада құрамында дәрігер, фельдшер, құтқарушы және медициналық-құтқару реанимобиль жүргізушісі бар.
Оқиға орнына келгеннен кейін шұғыл әрекет ету бригадасының медицина қызметкерлері жақын маңдағы жол бойындағы дәмханаға 10 жолаушыны эвакуациялады. Қолайсыз климаттық жағдайларды (қоршаған орта температурасының төмендігі) ескере отырып, автобус жолаушыларына психологиялық, консультациялық көмек көрсетті, медициналық тексеру жүргізді.
«Шығанақ» ТМҚП қызметкерлері жолда қалған жолаушыларға дер кезінде қажетті көмекті көрсетті. Сынған автобуста жөндеу жұмыстары жүргізілгеннен кейін, ол өз бағыты бойынша қозғалысты жалғастырды.