Түркістан облысында заңсыз аңшылықпен айналысқан тұрғын анықталды. Азаматтан сойылған арқар еті, қару мен оқ-дәрілер табылды, – деп хабарлайды kazlenta.kz тілшісі Polisia.kz сайтына сілтеме жасап.
Созақ аудандық полиция бөлімінің қызметкерлері “Басқайрық” сайы тұсында жергілікті тұрғыннан сойылған арқар етін тапты.
Нақтырақ айтсақ, Созақ ауданы табиғатты қорғау тобының инспекторы мен “Қаратау мемлекеттік табиғи қорығы” қызметкерлері күнделікті жұмыс атқару кезінде, таулы аймақтан күдікті ер адамды байқап, оны тоқтатып, не мақсатпен жүргенін сұрастырады. Сондай-ақ тұрғынның өзімен бірге алып келе жатқан қапқа көзі түсіп күмәнданған полицей тексеру жүргізеді. Тексеріс кезінде ер адамнан ойық ұңғылы кіші калибрлі ТОЗ-8 және ТОЗ-12 аңшы мылтығы, 16 оқ-дәрі тәркіленіп алынды. Одан бөлек арқарға ұқсас бөлшектенген жануардың жаңа сойылған еті табылды. Қару мен жануар етіне сараптама тағайындалды.
Қазіргі уақытта аталған факт ҚР ҚК-нің 337-бабы (Заңсыз аңшылық) бойынша тіркеуге алынып, сотқа дейінгі тергеу амалдары жүргізіліп жатыр.
Түркістан облысының полиция қызметкерлері азаматтарға ҚР-ның Қызыл кітабына енгізілген құрып кету қауіпі бар, сирек кездесетін жануарларды атып алуға байланысты қылмыстық жауапкершілік қарастырылғанын қатаң ескертеді.