Ақтөбеде "Қауіпсіз үй" жедел-профилактикалық іс-шарасы аясында есірткі заттарын заңсыз сақтау дерегі анықталды, деп хабарлайды kazlenta.kz тілшісі Polisia.kz сайтына сілтеме жасап.
Саяжай аумағында 33 жастағы ер адамды тексеру кезінде полиция қызметкерлері одан өсімдік тектес зат салынған пакетті тәркіледі. Кейін ер адамның тұрғылықты жерінде жүргізілген тінту барысында қорадан ішінде 15 орамасы бар пакет пен өсімдік тектес зат салынған сөмке табылды.
Сараптама қорытындысына сәйкес, тәркіленген заттың марихуана екені расталды. Оның жалпы салмағы 1,7 келіден асты. Сонымен қатар сараптама ер адамның есірткілік масаң күйде болғанын көрсетті. Қазіргі уақытта аталған дерек бойынша оқиғаның барлық мән-жайын анықтауға бағытталған қажетті шаралар жүргізіліп жатыр.