Қазақстан Республикасы Премьер-министрінің бірінші орынбасары Нұрлыбек Нәлібаевтың төрағалығымен мұнай-газ саласындағы Қазақстан-Қытай ынтымақтастығы жөніндегі жұмыс тобының бесінші отырысы өтті, деп хабарлайды kazlenta.kz тілішсі Үкіметтің баспасөз қызметіне сілтеме жасап.
Отырысқа энергетика министрі Ерлан Ақкенженов, Қытай ұлттық мұнай-газ корпорациясының (CNPC) басшысы Чжоу Синьхуай, екі елдің ұлттық мұнай-газ компанияларының басшылары мен өкілдері қатысты.
Тараптар мұнай-газ, энергетика салаларындағы екіжақты ынтымақтастықтың қазіргі жай-күйі мен даму перспективаларын, бұрын қол жеткізілген уағдаластықтардың орындалу барысын талқылады.
Нұрлыбек Нәлібаев Қазақстан мен Қытай арасындағы жан-жақты стратегиялық әріптестіктің жоғары деңгейін атап өтіп, энергетика саласындағы бірлескен жобаларды уақтылы жүзеге асырудың маңыздылығына тоқталды.
Отырыс барысында тараптар мұнай жеткізу көлемін ұлғайту, мұнай құбырларының өткізу қабілетін кеңейту, геологиялық барлау жұмыстарын жандандыру, газ саласындағы ынтымақтастықты дамыту, Шымкент мұнай өңдеу зауытының қуатын кеңейту, мұнай-газ химиясы жобаларын жүзеге асыру және жаңа энергетика бағыттарындағы өзара іс-қимыл мәселелерін талқылады.
Жер қойнауын пайдалану саласындағы ынтымақтастықты жалғастыру, қолданыстағы келісімшарттардың мерзімін ұзарту мен бірлескен жобаларды жүзеге асыру барысында туындайтын мәселелерді шешу жолдары қаралды.
Отырыс қорытындысы бойынша Нұрлыбек Нәлібаев бірлескен жобаларды жүзеге асыруды жеделдетудің, өзекті мәселелер бойынша өзара тиімді шешімдер қабылдаудың, қол жеткізілген уағдаластықтардың уақтылы орындалуын қамтамасыз етудің маңыздылығын атап өтті.